قصيدة رفات قصيدة.. للشاعر فكري ناصر
وانا المحاصر بالهموم المضحكه
والرحله قبضة جمر
ف إدين التمنّي
العشق ساخر و الحلول متفبركه
والحلم طول الوقت
فطسان م التأنّي
والمعني نورها في السطور الحالكه
والشعر غير النثر
مطرب مش مغنّي
وحبيبتي رغم القرب
بتشرّ اغتراب
والقلب جوّه التوهه متلهّف عليها
عارفه بداء العاشقين
ودواها ناب
بيدس ترياقه بوجع للي شاريها
وانا الغريب اللي اتولد
تحت التراب
وقيامتي وقت الإحتياج
زحفًا اليها
بُعدك ياعقلي
نِسْبي مافهمتوش
رافع لعين الجهل سبّابه
والوسطي للي
دمعهم مغشوش
تجريد لنحتك ناس بتتغابي
فنان جنونك
ع الزمن مرووش
كشعاع امل من قلب دبّابه
إعشق وسيب الفهم ياقلبي
كل اللي فهموا
عاشوا مش شايفين
طفل الفرَح لساه بريء يحبي
وانا وانت نضحك
للشجن فيلين
واعزف نغم لما الحنين راح بي
وف حضنها ببقي
الشقي المسكين
إرسال تعليق