من رسائل سندباد.. الشاعر عادل أبو عبا
(( من رسائل سندباد ))
علشان عيونك تاني هابدأ
ولبحرك المليان عواصف برضه هالجأ
وافرد لقلبي شراع ورق
واعلن علي كل الملأ
من تاني إني السندباد
اللي بتخشاه المواني
وابدأ طريقك من جديد
يمكن تحسي بلوعتي
وتدلي خيلك عن مكاني
أنا يا حبيبتي من البداية مانيش ضعيف
ومانيش قوي
علي قد ما تحملت من هجرك كتير
وسافرت يامه عشان عيونك في البحور
وعبرت بحر الويل وانا بانده عيونك
وهجرت يامه كتير قصور
وجزاير الموت اللعينة بتنتحر قدام جنوني
والموج بيعلن ثورته ويخدع ظنوني
دابت سفينتي من السفر
وخيولي تعبت م الرحيل
والليل أكلني بظلمته
ورماني في الأخر عليل
عمال احايل في الجراح
علشان تطيب
لكنها .... في الأخر اتحالفت مع الموج عالغريب
ورماته لشطوط البعاد والفرهدة
وحبيبته عالشط البراح
عماله تغزل من ضفاير شعرها حواديت عن الطير البعيد
وتكيد بتعذيبه العدا
وبرغم دا .....
وحشاني موت ...
ووحشني هز جريد نخيلك
لما السبايط تنفرط .._
علي قلبك المسجون في جب من السكوت
وانا لو يإيدي في يوم اجيلك
وامتطي صهوة خيولك
كنت جيت ..
بس يا خساره الأمان
فات دروبي من زمان
والصحاب للموت باعوني
والخطر دق البيبان
والبحور للموج رمتني
ياللي بالترحال سبتني
قلبي تايه وسط ليلك
والأمان في البحر فاتني
والعواصف يامه هزت فيه وسابت قلعه متني
والشدايد علمتني
إن مهما الريح تعاند .. مانحنيش
وان ويا الريح مفيش غير المجازفة
وانها لما تواتي
تبقي بتجهز لعاصفة
عمر قلب الموت ما يصفي ..
أو يعاهد ..
واما ييجي
يبقي لازم له نسلم
دون مانبكي
أصل قلب الموت مابتهزوش مباكي
ولا بيخاف جراح
وان صاحبك مهما حرحك طال وهزه
يبقي أوفي كتير لنفسه
والرهان في العمر عاللي بينحني
لجل متعدي الرياح
يبقي بيراهن علي موتك وموتي
لجل يبقي
كلنا داخلين مسابقه
عاللي يلحق قطر موته
يبقي سابق
والزمن ناصب مشانق عالدروب
والرحاية دايرة تطحن في القلوب
واللي بيعاند طريقه بيبقي فارس
عمرة مايخاف م السنين
وان لما يزيد أمانك يبقي خاف
م الأمان تيجي المخاوف
يبقي وسط الخوف هييجي الخوف منين
كل دا وانتي ف أمانك مستحيلة
وف مخاوفك مستحيلة
ياللي بالأحلام بخيلة
حتى عالطير السجين
اللي مرمي في أخر الحواديت ما راحت
وفي عيونه الحلم مسكون بالبعاد
وفي عنيها السندبادة تنكسر روح سندباد
ينهزم قلعه وسفينه لسحرها
يخسر قصاد السندبادة
بزيادة ... تغريبه وسفر
يا سحرها الملعون ومربوط بية مصيري
أنا ليه رماني اللي نشا الحواديت قصادك
رغم البعاد اللي ما بينا مقيداني بسحرها
ومسخرة الحواديت عليا تهزني
والجرح من جوا الألم بينزني
يفرطني ميت مليون سؤال
أنا سندباد حواديت بتفرح بيه عيال
محطوط ما بين اني احتمل هجرك
وبين اني انهزم
قدام جيوش الاحتمال
وانتي الأميرة في برجها العالي المحال
وفي حلم أجمل م الخيال
وأنا المعذب دون سبب
وأنا الأمير علي الموت
وتيار الغضب
والانكسار
انتي النهار...
والليل أنا ....
وما بينا سيف المستحيل
فاصل مابين الويل بويل
وجبال من الليل الطويل
وبحور مخاوف كلها من موج غبي
تتعجبي ...
لو تسمعي مني الحكاية كلها
أنا لما كنت في يوم صبي وسط العيال
ومحيراني بسحرها قصص الخيال
قربت من سورك عشان اعرف كما الناس الكبار
وغافلت يومها عساكر القصر الكتار
ووقفت مرعوب انتظر هلة ربيعك
والضحكة لسه بتحبي في القلب_
اللي فارش ضحكته علشان يساعك
طليتى زي البدر لما يهل
في الليل الغميق
فلمحت سر السحر في عيونك_
مشاور علي الطريق
وعرفت يومها ان السفر
مكتوب علي القلب البريء
وان الحكاية كلها
حواديت عشان تضحك وتتسلي الأميرة
وتنام وتحلم باللي سافر لجلها
في ابعد جزيرة
بيحارب الموت والطوفان
أنا يا أميرة تعبت خالص م السفر
ومن الرهان
امتى بقي هتخففي من سحرك المرصود_
علي النجمة اللي سافرت من زمان
وتنادي طير ساكن بعيد
يسقط علي مية عيونك
يغتسلمن بحر طلسمها الجليد
يفتح عيونه للنهار
ينفك سر السحر عن قلبه اللي مرهون بالبحار
لو تعرفي
دا البحر سر مالوش قرار
والليل لقلب السر سر
كل الأماني قصاد جيوشه بتنتحر
وانا طير غريب
تعبت سنينه من السفر
وجناحه كل من الرحيل
وهتعمل ايه الشمعة في الليل الطويل
وفي بحر مليان بالعواصف
والغيوم
يا هلترا ما خطرت علي بالك في يوم
ولا زارك الطيف في المنام
علشان في مرة يفكرك
ترمي علي الطير السلام
وتشيعيله النجمة تهديلة الطريق
وتلمي من الموج الحطام
وتلمي من الموج الحطام
إرسال تعليق