الشاعر علي مصطفى.. قصيدة « ومصر ازاي؟»
ومصر ازاي؟
وانا أول ما اقوم الصبح بالقى الهم فى الشارع
وبالقى وشوش ماليها العجز فى العشرين
وناس تنشر دموع الليل على احبال السطوح يمكن
ياخدها الصبح ويروّح
ويرجع فارد ابتساماته على الكفين
وحق اللى خلق فينا عقول وعينين
أنا شايف حكاوي زمان بتتبخر
ونور الشمس مش قادر يخلى عيون تشوف أوضح
فكل الخلق تتقدم
وبرضه بلدنا تتأخر
أنا عارف بإن الآن
كمان أرحم كتير م الجاي
وإن عياط فقير يوجع
بدون دمج الوجع بالناي
يا كل اللي تعب صمته
وتقّل حبتين في الشاي
صداع بلدي صبح مزمن
قولولي بجد إن أمكن
دي مصر إزاي؟
إرسال تعليق