قصيدة قلبي ملاذ العارفين.. للشاعرة بسمة شعبان
قلبي يا أول ملاذ العارفين و الأوليا
يا نهاية الأحلام
ضياها و مهرها
ياسفينة شايله من البشر تايهين
ومافيش في أرض الطيبين ظالم
ومافيش خطايا بتتمحي
ولا فيه قبول للشاردين
و في جوه كل شيطان رسول
وفي قلب كل وداع وصول
و مافيش ملاك مش مدعي
ولا في الرهان كسبان حصاني بالجموح
و ياروح مابعد الإنهزام
ماعادتش روح
خِذلان بينهش في الحشا
واتسوس العود اللي ياما شال حمول
ووشوش سواقي معتقه فيها السكوت
مصلوب بيوت فوق البيوت
من غير بيبان
من غير شباببيك الجيران
من غير سطوح عشش عليه الصبر تنهيد الأدان
وانا من زمان مدبوح قوي
وبداري صمتي بالكلام
بالضم بواقي العمر في قلوب الحمام
وابعت رسايلي لربنا ترجع مطر
و يا قطر واقف مطرحه مش منتظر
و لا مستنيينه بالحنين
تاهت خطاوي المشتاقين عن سكتك
و اتشبكت كل الخيوط
و الموت في روح الميتين
ما بقاش فيه موت
متغربلة الأيام وراك
والجاي عالم الله بيه
وعملت من روحك لجام
بيشد فينا
نشد فيه
والمرة دي جيت لك بطولي
لا معايا نور ولا فيا ناس
ورميت ورايا كل ما وصونا بيه
من غير جنازة أو قداس
وحدي اللي هامشي في موكبي
وهاشيلني فوق كتفي و هاسمي برحمتك
و أرفع كفوفي للسما واطلب سلام
تعبانة روحي م الكلام
و يارب تقبل سكرتي
ما لقيتش احن من الحروف أتدارى فيه
ما لقيتش غير حضن السطور أتدفى بيه
واسكن ملامحه برجفتي
قلبي اللى عرفك بالمحبة وكنت له
جاي لك عزيز النفس مهزوم الأماني
افتح دراع الفجر وبوسع السما
ترجع لك الروح العفية مسلمه
راضية و أمينة و آمنة
مليون ملاك هيأمنوا و يلقنوا الروح الشهادة
إرسال تعليق