الشاعرة ابتسام شعبان.. قصيدة بصة عينيك
وباخاف قوي بصة عنيك
وماخفش من ديب الفلا
كل القلوب الدايبه فيهم
مجروحين
كل الخطاوى الرايحه ليك
متبرجله
ضحكة عينيك ضد العيا
للعيانين
ضحكة عينيك كاسره الحيا
في عيون صفوف المشتاقين
يا بخت كل المشنوقين
لو كات عيونك مقصله
كل العيون سوقي
عينيك متفصله
وعينيك يا واد
جايين جداد
باقي العيون
مستعمله
ضحكة عينيك المدهشه
كاويه الحشا
كالجوع في أيام الغلا
مليون إجابه جاوبتها لمليون سؤال
لكني أصعب من عيونك
ما انسألتش
أسئلة
إرسال تعليق