الشاعر محمد النحراوي.. قصيدة «القاهرة» الفائزة في مهرجان إبداع ٧ للجامعات
القاهرة
كان الرصيف ..
مكنوس من بياعين الورد
والبرد قاعد تحت ضى عمود فارش ملايتُه
وأنا كنت قاعد بستهجى الوحده والرعشه في قصيدتي
الدنيا ليل والنوم كبَّس ..
وأنا كُنت خايف إنّي أنام في بلاد غريبة
لا ليا فيها صديق كِتافُه خُداديّه ..
ولا حبيبه
ولا حِيلتي غِير الصبر أحُطّه بين كُفوف الشحاتين
أنا كُنت خايف إنّي أكون ..
مطرود ساعتها بَره رحمة ربنا
شوفت الشيطان ماشي بيرسم في الخطايا
قبل النهار ما يبُّخ نوره ع الرصيف
شوفت المطاعم نورها بيزغلل في عيني
بإشارة منها إني شكلي هنام خفيف
كلمت صاحبي وقولت له تعالى لي حالاً
قاسية المدينة يا " مصطفى " وأنا ابن رِيف
كانت دي أول مره أشوف القاهرة
حَواريها فاضية
حسِّيت ساعتها بقيمة الزحمة
اللي ياما قرفت منها
كات الشوارع فاضية م الناس إلا منّي
وم الللي زيي و م العساكر
واللي طرداهم حياتهم بَره منها
كان جوز عساكر ..
صوت البياده في مِشيُهم خارم وِداني
مُومس بتنفخ فُجرها في دُخان عماني
عامل نضافة ماشي بيفتِّش طريقه
يمكن يلاقي في سكِّته لُقمة حياه
والفقر شوفته ع الرصيف نايم مِمدد
حسِّيت ساعتها إن الرصيف طُوق النجاه
وإن العراه والبردانين واخدينه ستر وبطانية
كلمت صاحبي وقولت له .. "انجز شويه "
وبدأت أَشحطت معدتي بين القهاوي
وأشرب ضلام الليل في بُنْ الإستكانه
ماعرفش كانت قهوة دي ... ولا إهانة
كان الصداع بيزُق رجلي ناحية أقرب أغزخانة
كات الحياة دخلالي عَركه
وتربست كل البيبان مفتاح وضَبَّه
كشرِّت لعيوني نابها وبهدلتني
زى ما تكون المدينة بتناديني بعِلو صوتها
كان يوم اسود يوم ما جِيتني
لملمت نفسي من القهاوي وليلي لأغْبر
و رجعت تاني للرصيف وأنا حيلي جُثّة
كلمت صاحبي وقولت له ... " يا صاحبي لسه " ؟
الصبح شقشق والبشر بَدروا المكان
ماعرفش ليه حسِّيت ساعتها بالأمان
ولمحت شمس الصبح جايه في ايد صديقي
فبلعت رِيقي فارتويت ورويت جَفافي
ونفضت تعبي المستربع فوق كتافي
وحضنت صاحبي حُضن غُربة وطول سفر
وحكيت له كل اللي حصل لي وهو غايب
وإني شوفت في لِيلي لأَكحل العجايب
زى ما تكون المدينة عارفه إني غريب وضِيف
قال لي طبعاً ..
المدينه دي لِيلها يابني ... حَد سِيف
وانت لسَّه جديد عليها ..
كنت يابني اهرب بجلدك م اللي فيها
قبل ما يِفضى الرصيف
إرسال تعليق