الشاعر مصطفى فهمي.. قصيدة العهدة
والدي اللي رب الخلق ياما اداه
لما بلغ إحسانه ع الكون منتهاه
ولقاني قُلت "يا بابا" أسرع م العيال
كرمشني ف إيدين الحياه لله
وسلم عهدته للموت
وتركني في جيوبها الوسيعه المظلمة
ورقة وقلم يُتما في وسط البنكنوت
مقدرش افوت في الصعب بس بافوت!
فكري سرح بالأجرة من بدري على قوتي
وانا صبري طال على ناصية الملكوت
الفقر أجبر جوفي ع السُنه
وكفوفي ولا يوم داقت الحنه
عايش ف جنة من الخيال مرتاح
كل اما نفسي تجيبني ع التفاح
ألاقيني فجأه خرجت م الجنه!
أهبط على البلد اللي لا شعر انكتب
ولا شابٌ خَطب
ولا ترمسة ملت من الحرقان
على صدور الولاد بالليل
أسعى على الممكن بحلم المستحيل!
وأصدق الحلم اللي ممكن ينتهي بمفيش
واني هاعيش
لما الحقيقة المُرة تدبحني بسكينة "الخليل"!
أقطف من الشعر المنبت وسط طرح النيل
وافتح دليل الدنيا وأبحث مين انا؟
وانا ليه هنا؟
واما يلاحظوا عليا كتر الأسئلة والعس
يقيدولي نور الدنيا لاجل ما اشوف
وانا مطلبي يطفوها يمكن أحس
يمكن في عز ما اجس
ألوان الامل ينبض لي حب
يمكن في عز الكبت يصرخ حس
وساعتها هاعرف مين انا
وانا ليه هنا
فاكتب قصيدة بدافع الإحسان!
واهرب كما الشجعان!
من الدنيا القانون
اللي مصمم يقفش احلامي البريئة بفعل فاضح ع الطريق
واجري كما النُبلاء على الموت
اللي في نهاية طريق العمر
مهما يطول
بيستنظرني ولا أجدع صديق
وأسلمه العهدة
إرسال تعليق